Kaapstad misdaad
Polisie reageer op skietery, kom op lyk af
Man in motor doodgeskiet
MISDAADTONEEL: Athlone, Kaapstad: ‘n 35-jarige man is dood in sy motor aangetref nadat hy verskeie kere geskiet is.
‘n Skakelbeampte vir die Wes-Kaapse polisie, konstabel Ndakhe Gwala, sê die skietvoorval het Maandag, 19 Oktober 2026, omstreeks 13:25 op die hoek van Bokmakierie- en 7de Laan plaasgevind.
“Athlone-polisie het op ‘n skietery gereageer en met hul aankoms die lewelose liggaam van ‘n 35-jarige man in ‘n voertuig aangetref. Hy het verskeie skietwonde aan sy liggaam opgedoen en is deur mediese personeel op die toneel dood verklaar.
“Die omstandighede rondom die skietery word ondersoek en daar word vermoed dat die motief bende-verwant is. In hierdie stadium is niemand nog gearresteer nie,” het Gwala gesê.
Speurders trek 17-jarige seun in Vygieskraal vas
Tiener vas vir dubbele moord
MISDAADTONEEL: Athlone, Kaapstad: ‘n Tiener is gearresteer in verband met ‘n dubbele moord wat op 24 Augustus 2026 plaasgevind het.
Volgens die Suid-Afrikaanse Polisiediens (SAPD) het speurders van die Anti-bende-eenheid die 17-jarige manlike verdagte Sondag, 18 Oktober 2026, op twee klagte van moord gearresteer.
Die SAPD sê die noodlottige skietvoorval waarin twee mans die oggend van 24 Augustus hulle lewens verloor het, het in Lower Klipfontein-weg, Athlone plaasgevind.
“Hy is in die Vygieskraal-informele nedersetting in Athlone vasgetrek.
“Terwyl die lede te voet in Vygieskraal gepatrolleer het, het hulle ‘n verdagte man opgemerk en hom deursoek. Hy is in van ‘n 9mm-pistool met 15 rondtes ammunisie gevang en is gearresteer vir die besit van ‘n ongelisensieerde vuurwapen en die onwettige besit van ammunisie,” het die SAPD gesê.
Verdagtes vlug na bewering in twee motors
Skietery ruk Strandfontein
JONGSTE! Die bevelvoerder van die Wes-Kaapse provinsiale mediasentrum, luitenant-kolonel F.C. van Wyk, bevestig die voorval het Saterdagmiddag, 17 Oktober 2026, omstreeks 17:30 in Dinghie-sirkel plaasgevind.
Van Wyk sê twee mans, onderskeidelik 33 en 44-jaar-oud, is noodlottig gewond, terwyl twee ander beseer is. “Volgens berigte het twee wit VW Polo’s, met onbekende registrasienommers, tot by die slagoffers gery en op hulle geskiet, waarna die insittendes van die toneel gevlug het. Daar word vermoed dat die motief bende-verwant is.”
Enigeen met inligting kan Stop Misdaad by 08600 10111 kontak of die MySAPS-App anoniem gebruik.
MISDAADTONEEL: Strandfontein, Kaapstad: Strandfontein is Saterdagmiddag, 17 Oktober 2026, deur ‘n skietvoorval in Dinghie Circle geskok.
Onbevestigde berigte dui daarop dat drie mense voor ‘n huis geskiet is deur verdagtes wat in twee motors gevlug het.
Die skietery het plaasgevind kort nadat data van die Suid-Afrikaanse Polisiediens (SAPD) bevestig het dat Strandfontein volgens statistieke een van die veiligste voorstede in Kaapstad is, met ‘n misdaadsyfer wat ver onder die Stad se gemiddeld is.
Volgfens die statistieke vanaf April tot Junie 2026 het die Strandfontein-polisiedistrik ‘n misdaadsyfer van slegs 3,42% aangeteken, wat beter is as die algehele gemiddeld van 5,11% vir die Stad Kaapstad. Slegs vyf van die stad se 63 polisiedistrikte het gedurende hierdie tydperk minder misdade gehad.
Iemand het op sosiale media die volgende gesê: “In die helder daglig op ‘n Saterdagmiddag. Ek kan nie glo hoeveel skote afgevuur is nie. Dit was hard.”
Crime Scene Report wag op amptelike kommentaar van die polisie oor hierdie voorval.
Verdagtes skiet vier, een slagoffer sterf
Skietery maak hospitaal to
MISDAADTONEEL: Retreat, Kaapstad: Die Retreat-daghospitaal het Maandagoggend, 19 Oktober 2026, weer oopgemaak ná ‘n noodlottige skietvoorval wat buite die fasiliteit gebeur het.
Die Wes-Kaapse Departement van Gesondheid en Welstand was genoodsaak om die hospitaal Sondagaand, 18 Oktober 2026, te sluit weens “’n veiligheidskwessie buite die perseel”.
Die Departement het Maandagoggend aangedui dat alle dienste normaal funksioneer en personeel en pasiënte veilig is.
Die Suid-Afrikaanse Polisiediens het gesê hy ondersoek ‘n skietvoorval waarin ‘n man doodgeskiet en drie ander gewond is Sondag in Bernsteinstraat, Retreat.
‘n Woordvoerder vir die Wes-Kaapse polisie, sersant Wesley Twigg, het gesê ‘n 41-jarige man is op die toneel dood verklaar.
“Die ander slagoffers, tussen 16 en 21-jaar-oud, is na ‘n mediese fasiliteit vervoer vir behandeling. Volgens berigte het die vier in die pad gestaan toe verdagtes in ‘n onbekende voertuig op hulle losbrand, waarna hulle gevlug het.
“Die omstandighede rondom die voorval word ondersoek,” het Twigg gesê.
Die Our Lives Matter Community Action Group het ‘n beroep op dringende ingryping gedoen ná hierdie jongste skietvoorval, wat volg op ‘n reeks sterftes en beserings in ander voorvalle in die onmiddellike omgewing.
Lees ook: Man en vrou sterf in skietery – Crime Scene Report; Twee vas ná dubbele moord – Crime Scene Report; Man helderoordag vermoor – Crime Scene Report
Polisie kry 69 000 Mandrax pille in Grassy Park
Vrou (58) vas oor R5,5m se dwelms
MISDAADTONEEL: Grassy Park, Kaapstad: ‘n 58-jarige vrou is gearresteer nadat die polisie Mandrax tablette met ‘n geskatte straatwaarde van R5,5 miljoen by ‘n stoorfasiliteit in 8ste Laan, Grassy Park gekry het.
Die Nasionale Intervensie-eenheid en Misdaadintellegensie het in die vroeë oggendure van Donderdag, 15 Oktober, ‘n operasie uitgevoer nadat inligting ontvang is oor dwelm aktiwiteite by die betrokke adres.
“Met hulle aankoms omstreeks 01:40 is ‘n deeglike deursoeking gedoen het die polisie die plek deeglike deursoek en afgekom op 69 sakke wat elk 1 000 Mandrax-tablette bevat het.
“Die 58-jarige vrou word in die Grassy Park-polisieselle aangehou op aanklag van die besit van dwelms en sal Vrydag, 16 Oktober 2026, in die Wynberg-landdroshof verskyn,” het die Suid-Afrikaanse Polisiediens gesê.
Die provinsiale kommissaris van die Wes-Kaapse polisie, luitenant-generaal Sizakhele Dyantyi, het die uitstekende werk van SAPD-lede geloof om dwelmvrye en veiliger gemeenskappe in die provinsie te verseker.
Pistool is twee jaar gelede in Eldoradopark gesteel
Tiener met gesteelde wapen betrap
MISDAADTONEEL: Lavender Hill, Kaapstad: Die polisie het ‘n 16-jarige seun gearresteer vir die besit van ‘n vuurwapen wat in Eldorado Park, Johannesburg, gesteel is.
Lede van Operasie Prosper was Sondag, 11 Oktober 2026, op patrollie in die Steenberg-gebied toe hulle omstreeks 17:10 van ‘n skietvoorval in die omgewing in kennis gestel is.
Volgens die Suid-Afrikaanse Polisiediens (SAPD) het hulle in Depsiton-straat, Lavender Hill, gery en twee manlike verdagtes opmerk wat in hul rigting hardloop.
“Hulle het die twee voorgekeer en een verdagte was uiters senuweeagtig. Die lede het opgemerk dat hy iets wegsteek, en tydens ‘n deursoeking het hulle ‘n 9mm-Pietro Beretta-pistool met ses rondtes ammunisie onder sy baadjie gevind.
“Die 16-jarige verdagte is in hegtenis geneem vir die besit van ‘n ongelisensieerde vuurwapen en die onwettige besit van ammunisie. Met verdere ondersoek is vasgestel dat die vuurwapen in Junie 2024 by die Eldorado Park-polisiestasie as gesteel aangemeld is,” het die SAPD gesê.
KRAAIFONTEIN: Op Maandag, 12 Oktober 2026, is lede van die Openbare Orde-polisie in die Kraaifontein-gebied ontplooi om die stryd teen bendegeweld, afpersing en rooftogte voort te sit.
Omstreeks 13:00 was die lede op patrollie in Daza-straat toe hulle opmerk hoe ‘n man begin hardloop toe hy die polisie sien.
“Die lede het hom vasgetrek en deursoek. Hulle het ‘n 9mm-pistool sonder ‘n reeksnommer, drie Mandrax-tablette en twee sakkies Tik in ‘n sak wat hy by hom gehad het, gevind.
“Die 29-jarige verdagte is in hegtenis geneem vir die besit van ‘n verbode vuurwapen en die besit van dwelms,” het die SAPD gesê.
Skieters teiken 23-jarige en haas weg van toneel
Man helderoordag vermoor
MISDAADTONEEL: Retreat, Kaapstad: ‘n Man is in ‘n straat net agter die Retreat-daghospitaal doodgeskiet.
Die voorval het helderoordag Donderdagoggend, 8 Oktober 2026, omstreeks 11:00 in Blagden-straat plaasgevind terwyl baie mense die hospitaal besoek het.
Wesley Twigg, ‘n woordvoerder vir die Wes-Kaapse polisie, het gesê Steenberg-polisie het op ‘n klagte van ‘n skietery reageer en met hul aankoms op die toneel, ‘n man met skietwonde aan sy liggaam gevind.
“Die slagoffer, ‘n 23-jarige man, is deur mediese personeel op die toneel dood verklaar. Volgens inligting is die slagoffer deur twee verdagtes genader wat hom geskiet en van die toneel gevlug het.
“Daar word vermoed dat die motief vir die aanval bendeverwant is. Steenberg speurders ondersoek ‘n moordsaak,” het Twigg gesê.
Enigeen met inligting oor hierdie skietvoorval kan Stop Misdaad by 08600 10111 kontak of die MySAPS-App anoniem gebruik.
Skieters wond ook vrou en steeds op vrye voet
Twee sterf in Lavender Hill skietery
MISDAADTONEEL: Lavender Hill, Kaapstad: Die Suid-Afrikaanse Polisiediens (SAPD) het ‘n moordondersoek van stapel gestuur ná ‘n dodelike skietvoorval in Lavender Hill Dinsdag-oggend, 6 Oktober 2026.
Volgens die polisie het die voorval omstreeks 8:20 in Muir-hof, Depsiton-singel, plaasgevind, waar twee mans doodgeskiet en ‘n vrou gewond is.
“Polisiebeamptes het op ‘n klag van ‘n skietvoorval gereageer en met hul aankoms op die toneel die slagoffers met skietwonde aan hul liggame aangetref. Die mans is deur mediese personeel op die toneel dood verklaar, terwyl die vrou vir behandeling na ‘n mediese fasiliteit vervoer is,” het sersant Wesley Twigg, ‘n skakelbeampte vir die Wes-Kaapse polisie, gesê.
Daar word vermoed ndie motief vir die aanval is bendeverwant. Die verdagtes het van die toneel gevlug en is steeds op vrye voet.
Speurders van Steenberg-polisie ondersoek sake van moord en poging tot moord.
Die polisie het ‘n beroep op die publiek gedoen vir hulp. Enigeen met inligting oor die skietvoorval kan Stop Misdaad by 08600 10111 kontak of die mobiele MySAPS-App anoniem gebruik.
Vrou ook gewond toe skieters mense in straat aanval
Drie sterf in Lentegeur-bloedbad
JONGSTE! Die Suid-Afrikaanse Polisiediens het bevestig dat ‘n vrou wat ernstige skietwonde in die skietvoorval in Lentegeur opgedoen het, aan haar beserings beswyk het. Dit bring die dodetal op vier te staan in die jongste massa skietvoorval wat Suid-Afrika die afgelope paar weke geruk het.
MISDAADTONEEL: Mitchells Plain, Kaapstad: Drie mense is doodgeskiet en een is gewond in nóg ‘n bloedbad in Kaapstad.
Die Suid-Afrikaanse Polisiediens (SAPD) in die Wes-Kaap het nou ‘n soektog van stapel gestuur na vier verdagtes wat betrokke was by die skietvoorval in Lentegeur, Mitchells Plain, laat Woensdagaand, 30 September 2026.
Die polisie het omstreeks 23:15 op ‘n skietery in Blombos-straat reageer.
“Met hul aankoms het lede op twee mans met skietwonde afgekom. ‘n Derde man, wat ook skietwonde opgedoen het, is in Eislebenweg gevind nadat hy blykbaar van die skuts gevlug het. Al drie is op die toneel dood verklaar.
“‘n Vrou wat ernstige skietwonde opgedoen het, is vir mediese behandeling na die hospitaal vervoer,” het die SAPD gesê.
Vier gewapende verdagtes, wat in ‘n wit Nissan Almera met donker vensters gery het, het na bewering die slagoffers genader, op hulle losgebrand en van die toneel gevlug.
Die motief vir die skietery is nog nie amptelik vasgestel nie en vorm deel van die voortdurende ondersoek. Speurders van die Anti-Bende-eenheid ondersoek die voorval.
Volgens die SAPD volg die ondersoekspan alle beskikbare inligting op en kyk hulle na kringtelevisie- (CCTV) beelde en soek getuies wat kan help om die verdagtes te identifiseer.
Die Wes-Kaapse provinsiale polisiekommissaris, luitenant-generaal Sizakhele Dyantyi, het sy kommer uitgespreek oor skietery en ‘n beroep op ondersoekers gedoen om die verantwoordelikes vinnig te identifiseer en te arresteer.
Enigeen met inligting oor die voorval of weet waar die verdagtes skuil word versoek om Crime Stop by 08600 10111 te skakel of die MySAPS-App te gebruik.
Verdagte ook gearresteer oor nagemaakte vuurwapens
Polisie slaan hard teen dwelms
MISDAADTONEEL: Delft, Kaapstad: Vier mense – twee mans en twee vroue – is gearresteer op aanklagte wat verband hou met dwelms en onwettige vuurwapens.
Volgens die Suid-Afrikaanse Polisiediens (SAPD) het lede verbonde aan Operasie Prosper – wat in die Delft ontplooi is om die voortdurende vuurwapengeweld, onwettige dwelmhandel en afpersing te bekamp – die arrestasies op Dinsdag, 22 September 2026, uitgevoer.
Die polisie het inligting opgevolg oor onwettige aktiwiteite in Hodna-straat, Delft.
“Hulle het ‘n 38-jarige man op die perseel deursoek en hy is in besit van ‘n 9mm-pistool, 45 rondtes ammunisie en 188 Mandrax-tablette gevind. Hy is op die toneel gearresteer.
“Later het hulle inligting opgevolg oor dwelmaktiwiteite by ‘n perseel in Sandriver-singel, Leiden. ‘n 47-jarige man is gearresteer vir die besit van twee namaak-vuurwapens en 40 sakkies tik,” het die SAPD gesê.
‘n 39-jarige vrou is later by ‘n perseel in Verlore-straat, Leiden, Delft, gearresteer nadat sy deursoek is en na bewering in besit van 53 sakkies Tik en ‘n onbekende hoeveelheid Tik wat nog verpak moes word, betrap is.
Die SAPD het gesê hulle het ook inligting opgevolg oor ‘n vrou wat dwelms verkoop by ‘n perseel in Mahli-straat, N2 Gateway, Delft. ‘n 46-jarige vrou is na bewering in besit van 420 sakkies Tik gevind en gearresteer.
KRAAIFONTEIN: SAPD-lede wat in Scottsdene, Kraaifontein, patrollie gedoen het, het inligting opgevolg dat iemand drank sonder ‘n lisensie verkoop. Met hul aankoms by die perseel in Bontebok-straat het hulle ‘n groot hoeveelheid alkohol gevind.
Toe die huiseienaar gevra is vir sy taverne lisensie, kon hy dit nie wys nie. Die 32-jarige man is gearresteer vir die verkoop van drank sonder ‘n lisensie.
RETREAT: Die polisie het ‘n 37-jarige vrou in hegtenis gearresteer wat na bewering in besit gevind is van 21 pakkies kokaïen by ‘n Wendy-huis in Beethoven-straat.