KAAPSTAD: Die Suid-Afrikaanse Polisiediens (SAPD) se handelsmisdaad-ondersoek-eenheid het vanoggend, Donderdag 4 Junie 2026, toegeslaan op ‘n kantoor van die Stad Kaapstad en verskeie wonings.

Die deursoek- en beslaglegging-operasies vorm deel van ‘n ondersoek waarby ‘n voormalige kontrakteur van die Stad Kaapstad, Triple C Maintenance and Services, betrokke is.

“Met deursoek- en beslaglegging-bevele in die hand, het ondersoek beamptes operasies by verskeie wonings en ‘n kantoor van die Stad Kaapstad uitgevoer. Tydens die operasies is 21 selfone en nege skootrekenaars vir forensiese ondersoek ingevat, tesame met ander potensiële bewysstukke relevant tot die saak.

“Omdat die ondersoek steeds aktief is, sal die SAPD nie in hierdie stadium verder kommentaar lewer oor spesifieke aspekte van die saak nie. Geen arrestasies is tydens vandag se operasies gemaak nie. Verdere optrede sal afhang van die bewyse wat ingesamel is en uitslae van die voortgesette ondersoeke,” het die SAPD in ‘n verklaring gesê.