MISDAADTONEEL: Nyanga, Kaapstad: Die polisie het ‘n kontantbeloning van tot R50 000 uitgeloof vir inligting oor ‘n moord wat hier plaasgevind het.

Volgens die Suid-Afrikaanse Polisiediens (SAPD) het die Nyanga-polisie op 29 Junie 2026 omstreeks 15:45 gereageer op ‘n skietvoorval waartydens Bashira Issaka (35), ‘n burger van Ghana, binne sy besigheid doodgeskiet is deur verdagtes wat na bewering afpersingsgeld geëis het.

Volgens die SAPD volg die ondersoekbeampte alle beskikbare leidrade op om die oortreders op te spoor en doen ‘n beroep op die gemeenskap vir enige inligting wat kan help daarmee.

Diegene wat inligting verskaf, sal anoniem bly. ‘n Kontantbeloning word aangebied vir inligting wat lei tot die suksesvolle arrestasie en skuldigbevinding van die verdagtes.

Inligting kan aan die ondersoekbeampte, sersant Donovan Peterson van die Provinsiale Eenheid vir Ernstige en Geweldsmisdade, verskaf word by 084 684 0909 of Stop Misdaad by 08600 10111.