NASIONAAL: Die Suid-Afrikaanse Polisiediens (SAPD) het ‘n man gearresteer wat in die Verenigde Koninkryk (VK) gesoek word vir die moord op sy vrou en twee dogters.

Ndodana Mkhanyisi Tshuma is Vrydag 10 Julie 2026 in Kensington, Johannesburg, gearresteer na ‘n intensiewe operasie waarby die SAPD se Interpol Nasionale Sentrale Buro, Misdaadintelligensie en die Georganiseerde Misdaad-ondersoekeenheid betrokke was.

Volgens die SAPD is Tshuma deur owerhede in die VK gesoek in verband met die moord op sy vrou, Nothabo Zandile Tshuma (42), en hul twee dogters, Natalie (15) en Nala (5), wie se liggame by hul huis naby Bedford ontdek is.

Deur vinnige operasionele koördinering en intelligensie-geleide polisiëring het SAPD-lede die voortvlugtige suksesvol opgespoor.

Die Waarnemende Nasionale Kommissaris van die SAPD, Luitenant-generaal Puleng Dimpane, het alle lede wat by die operasie betrokke was geprys vir hul vinnige en gekoördineerde reaksie.

“Hierdie arrestasie toon dat Suid-Afrika nie ‘n veilige hawe vir voortvlugtiges is nie. Enigiemand wat glo dat hulle geregtigheid kan ontduik deur na ons land te vlug, moet weet dat die SAPD onvermoeid met internasionale wetstoepassingsvennote sal saamwerk om hulle op te spoor en te arresteer,” het Dimpane gesê.

Die verdagte sal Maandag 13 Januarie 2026 in die hof verskyn.