Lavender Hill skietery

 
 

Polisie soek inligting oor voorval in Lavender Hill

Meisie (9) stabiel ná skietery

MISDAADTONEEL: Lavender Hill, Kaapstad: ‘n Nege-jarige meisie ontvang behandeling in die hospitaal nadat sy Maandagaand, 16 November 2026, in bendes se kruisvuur getref is.

Die Suid-Afrikaanse Polisiediens (SAPD) het ‘n beroep op die publiek gedoen om na vore te kom met enige inligting wat kan help met die ondersoek.

Sersant Wesley Twigg, ‘n skakelbeampte van die Wes-Kaapse polisie, sê die skietery het omstreeks 20:30 in Militar-weg, Lavender Hill, plaasgevind.

Kort na die voorval het gerugte dat die meisie oorlede is, soos ‘n veldbrand op sosiale media versprei, maar dit is vinnig deur familielede ontken.

Volgens Twigg was die meisie reeds in ‘n private voertuig na ‘n hospitaal geneem teen die tyd dat die Steenberg-polisie op die toneel opdaag.

“Die slagoffer het ‘n skietwond aan haar liggaam opgedoen en is in ‘n stabiele toestand in die hospitaal. Die omstandighede rondom die voorval word ondersoek en niemand is nog gearresteer nie. Speurders van Steenberg SAPD ondersoek ‘n saak van poging tot moord,” het Twigg gesê.

Enigeen met inligting kan Stop Misdaad by 08600 10111 kontak, of die MySAPS-App gebruik om inligting anoniem deur te gee.


Skieters wond ook vrou en steeds op vrye voet

Twee sterf in Lavender Hill skietery

MISDAADTONEEL: Lavender Hill, Kaapstad: Die Suid-Afrikaanse Polisiediens (SAPD) het ‘n moordondersoek van stapel gestuur ná ‘n dodelike skietvoorval in Lavender Hill Dinsdag-oggend, 6 Oktober 2026.

Volgens die polisie het die voorval omstreeks 8:20 in Muir-hof, Depsiton-singel, plaasgevind, waar twee mans doodgeskiet en ‘n vrou gewond is.

“Polisiebeamptes het op ‘n klag van ‘n skietvoorval gereageer en met hul aankoms op die toneel die slagoffers met skietwonde aan hul liggame aangetref. Die mans is deur mediese personeel op die toneel dood verklaar, terwyl die vrou vir behandeling na ‘n mediese fasiliteit vervoer is,” het sersant Wesley Twigg, ‘n skakelbeampte vir die Wes-Kaapse polisie, gesê.

Daar word vermoed ndie motief vir die aanval is bendeverwant. Die verdagtes het van die toneel gevlug en is steeds op vrye voet.

Speurders van Steenberg-polisie ondersoek sake van moord en poging tot moord.

Die polisie het ‘n beroep op die publiek gedoen vir hulp. Enigeen met inligting oor die skietvoorval kan Stop Misdaad by 08600 10111 kontak of die mobiele MySAPS-App anoniem gebruik.


Vermoor in Hillview

Jongman uit kar doodgeskiet

MISDAADTONEEL: Hillview, Kaapstad: ‘n Jongman is Maandagaand 18 Mei 2026 doodgeskiet terwyl hy in ‘n straat in Hillview geloop het.

‘n Mediaskakelbeampte van die Wes-Kaapse Polisie, sersant Wesley Twigg, het gesê die 24-jarige man is omstreeks 21:00 in Potbergweg geskiet.

“Toe die polisie op die toneel aankom het hulle die slagoffer met skietwonde aan sy liggaam gevind. Volgens inligting het die slagoffer in die pad geloop toe ‘n wit voertuig langs hom stilhou en een van die insittendes op hom losbrand met ‘n vuurwapen. Die voertuig het daarna vanaf die toneel gevlug.

“Die motief vir die aanval is vermoedelik bendeverwant. Die Muizenberg-polisie ondersoek ‘n saak van moord,” het Twigg gesê.

Enigiemand met inligting oor hierdie voorval kan Crime Stop kontak by 08600 10111 of die mobiele MySAPS-App anoniem gebruik.