Kaapstad misdaad
Aanvalsgeweer in kar gevind
Vier vas na ontvoer-drama
MISDAADTONEEL: Retreat, Kaapstad: ‘n Ontvoeringsdrama het hom op Vrydag 26 Junie 2026 in Retreat afgespeel toe die Suid-Afrikaanse Polisiediens (SAPD) vier verdagtes in gearresteer het.
Die vinnige optrede deur die Wes-Kaapse Blitspatrollie het gelei tot die arrestasie van die verdagtes vir vuurwapen-verwante oortredings en sameswering om iemand te ontvoer.
Die arrestasies word toegeskryf aan Misdaadintelligensie en die Blitspatrollie se optrede, het die SAPD gesê.
Lede van die Blitspatrollie het gereageer op inligting oor verdagtes in ‘n silwer Toyota Rumion, wat saamgesweer het om ‘n slagoffer in Retreat te ontvoer. Hulle het die voertuig in 11de-laan, Retreat, opgemerk en dit deursoek.
Die lede het ‘n aanvalsgeweer met 18 rondtes ammunisie en ‘n pistool met sewe rondtes ammunisie gevind. Hulle het ook ‘n stel Oos-Kaapse nommerplate en ‘n sakkie met sewe rondtes geweer-ammunisie en twee selfone gevind.
Die vier verdagtes tussen die ouderdomme van 25 en 36-jaar sal Maandag 29 Junie 2026 in die Wynberg-landdroshof verskyn.
Een dood, 6 beseer toe skieters losbrand
Bloedbad in Manenberg
MISDAADTONEEL: Manenberg, Kaapstad: Manenberg het vroeër vanaand, 17 Junie 2026 soos ‘n bloedbad gelyk toe gewapende mans op ‘n groep mense in Rio Grande Walk geskiet het.
Een persoon is dood en ses ander beseer, waaronder ‘n polisiebeampte.
Volgens ‘n media skakelbeampte vir die Wes-Kaapse Polisie, kaptein FC van Wyk, het ‘n silwer-grys motor in Rio Grande Walk afgery naby ‘n groep mense stilgehou. Die insittendes het uitgeklim en wild op die mense, wat voor ‘n perseel gestaan het, begin skiet.
“Polisiebeamptes wat naby patroller het, het op die skietery gereageer en toe hulle op die toneel aankom het die verdagtes verskeie skote op hulle afgevuur. ‘n 42-jarige SAPD-beampte is deur skrapnel in sy kop gewond. Die verdagtes het van die toneel gevlug en is nog nie gearresteer nie.
“Die oorledene is ‘n 22-jarige man, terwyl vier mans van 24, 35, 36 en 48-jaar-oud, en ‘n 56-jarige vrou beseer is. Hulle is per ambulans na ‘n nabygeleë hospitaal vervoer vir mediese behandeling. Manenberg-polisie het ‘n moordsaak en ses aanklagte van poging tot moord geregistreer,” het Van Wyk gesê.
Benewens die ondersoek is operasionele magte in die gebied ontplooi om die situasie te stabiliseer en om verhoogde polisie-sigbaarheid binne die gemeenskap te verseker, het hy gesê.
Mense met inligting word versoek om Manenberg SAPD te kontak by 021 699 9400 of Crime Stop by 08600 10111 of inligting anoniem via die MySAPS-App te verskaf.
Polisie loods ondersoek ná gru-ontdekking
Lyk in Durbanville gevind
MISDAADTONEEL: Durbanville, Kaapstad: Die Suid-Afrikaanse Polisiediens (SAPD) het ‘n beroep op die publiek gedoen om met inligting vorendag te kom nadat ‘n liggaam hier gevind is.
Die Durbanville SAPD het gereageer op ‘n klagte van ‘n ongeïdentifiseerde liggaam van ‘n man wat Woensdag, 17 Junie 2026 om 14:20 in Klipheuwel-weg gevind is. ‘n Geregtelike doodsondersoek is geopen.
‘n Nadoodse ondersoek sal uitgevoer word om die oorsaak van dood te bepaal. Enigiemand met inligting word vriendelik versoek om die ondersoekbeampte, speur-adjudant-offisier Marius Jaars, te kontak by 021 970 5600 of Crime Stop by 08600 100111.
Polisie kry onwettige vuurwapens terug
Aanklagte teen man hoop op
MISDAADTONEEL: Vanrhynsdorp, Matzikama: ‘n Man wat vir poging tot moord gearresteer en aangehou is, staar nog aanklagte in die gesig nadat die Vanrhynsdorp SAPD Maandag, 15 Junie 2026 ‘n onwettige vuurwapen in sy woonstel in Skool-straat ontdek het.
Volgens die Suid-Afrikaanse Polisiediens (SAPD) is die ontdekking gemaak tydens ‘n intelligensie gedrewe operasie. Die verdagte sal in die Vanrhynsdorp Landdroshof verskyn.
Mitchells Plain: ‘n Vuurwapen wat in 2025 by die Mtubatuba SAPD, in KwaZulu-Natal as gesteel aangemeld is, is in ‘n winkelsentrum in Mitchells Plain teruggevind.
Volgens die SAPD het lede van die Mitchells Plain-polisie ‘n klagte op Dinsdag 16 Junie 2026 omstreeks 17:25 opgevolg oor ‘n man wat met ‘n vuurwapen in ‘n winkelsentrum rondloop.
“Die lede het na die winkelsentrum gegaan en die verdagte genader. Hulle het hom deursoek en ‘n ongelisensieerde vuurwapen in sy besit gevind. Verdere ondersoek het aan die lig gebring die vuurwapen is in 2025 by die Mtubatuba SAPD, in KwaZulu-Natal, as gesteel aangemeld. ‘n 22-jarige man is deur die Lentegeur SAPD in hegtenis geneem,” sê die SAPD.
Operasie teen vervalste goedere skop af
Polisie slaan weer toe in Bellvile
JONGSTE! Vandag, Dinsdag, 16 Junie 2026, se operasie in Bellville het gelei tot die beslaglegging van nagemaakte produkte met ‘n geraamde waarde van R10-miljoen.
Meer as 40 winkels is tydens die operasie geteiken, wat gelei het tot die beslaglegging van nagemaakte handelsmerk-klere, skoene, sakke, horlosies, sonbrille, kêppies en verpakking.
Die multi-dissiplinêre span het bestaan uit lede van die SAPD, die Stad Kaapstad se metropolisie, wetstoepassing beamptes en Brand Protectors.
Dit volg op ‘n soortgelyke operasie wat ‘n week gelede by dieselfde winkelsentrum uitgevoer is, waartydens nagemaakte produkte ter waarde van meer as R98-miljoen gekonfiskeer is.
Volgens die polisie is die operasies deel van landwye pogings om die handel in nagemaakte en onwettige goedere, wat openbare veiligheid, wettige besighede en die land se ekonomie bedreig, te beveg.
MISDAADTONEEL: Bellville, Kaapstad: Die Suid-Afrikaanse Polisiediens (SAPD) se Nasionale en Wes-Kaapse Eenhede vir Vervalste en Onwettige Goedere, in samewerking met ander belanghebbendes, is tans besig met ‘n klopjag by ‘n winkelsentrum in Bellville.
Meer as 40 winkels word geteiken tydens vandag, Dinsdag 16 Junie 2026, se operasie.
Die klopvolge volg ná ‘n operasie ‘n week gelede by dieselfde winkelsentrum toe nagemaakte goedere ter waarde van meer as R90-miljoen gekonfiskeer is.
Moord in Hanover Park
Man vroegoggend doodgeskiet
MISDAADTONEEL: Hanover Park, Kaapstad: ‘n Man (38) is vroeg Saterdagoggend, 6 Junie 2026, hier doodgeskiet.
Die polisie het sê die skietery het omstreeks 03:10 in Johndown Walk plaasgevind. Toe die polisie van Philippi op die toneel aankom, het hulle die man se liggaam met skietwonde aan sy kop gevind.
Hy is deur mediese personeel dood verklaar. Die polisie ondersoek die motief agter die skietery. Geen arrestasies is nog gemaak nie.
Operasie lewer 1200 arrestasies in Mei
Prosper se druk gaan versterk
NASIONAAL: Operasie Prosper het gedurende Mei meer as 1200 mense agter tralies gesit vir ernstige misdrywe.
Die Suid-Afrikaanse Polisiediens (SAPD) en die Suid-Afrikaanse Nasionale Weermag (SANDF) sê egter dit is ver van genoeg en hulle gaan voort om georganiseerde kriminele netwerke wat betrokke is by onwettige mynbou, bende verwante geweld en ander ernstige en gewelddadige misdade te beveg.
Gedurende Mei 2026 het gekoördineerde multi-dissiplinêre operasies in vyf provinsies gelei tot die arrestasie van 1 287 verdagtes.
Die verdagtes is gearresteer vir misdade wat insluit onwettige mynbou oortredings, moord, aanranding met die doel om ernstig te beseer, onwettige besit van vuurwapens en ammunisie, oortreding van die Immigrasiewet en verskeie ander ernstige oortredings.
Operasie Prosper bestaan uit personeel van verskeie wetstoepassings- en sekuriteitsagentskappe wat ontplooi is in die Wes-Kaap, Oos-Kaap, Vrystaat, Gauteng, en Noordwes.
Operasionele aktiwiteite sluit in patrollies met hoë sigbaarheid, voertuig kontrolepunte, padversperrings, stop-en-deursoek-operasies en intelligensie-gedrewe aksies.
Arrestasies vir Mei sluit in:
▪ Agt verdagtes vir moord
▪ 384 verdagtes vir dwelmverwante oortredings
▪ Vier verdagtes vir aanranding ernstig
▪ Nege verdagtes vir die onwettige besit van vuurwapens en ammunisie
▪ Ses vir die onwettige besit van ammunisie
▪ Vier verdagtes vir die onwettige besit van materiaal wat goud bevat
▪ 363 vir die oortreding van die Immigrasiewet
▪ Sewe verdagtes vir die besit van vermoedelik gesteelde eiendom
▪ 502 mense vir oortredings wat insluit roof, besit van gevaarlike wapens, kwaadwillige saakbeskadiging, oortreding van die Wet op tweedehandse goedere, oortreding van die Padverkeerswet, bedrog en drank verwante oortredings
Items wat terug gevind is sluit in:
▪ 31 onwettige en ongelisensieerde vuurwapens en 11 replika-vuurwapens
▪ 1 703 rondtes ammunisie en 7 magasyne
▪ 13 740 liter onwettige alkohol
▪ Een gesteelde voertuig
▪ Verskeie hoeveelhede dwelms, insluitend dagga, Mandrax, Heroïen en CAT
Operasie Prosper vorm deel van die nasionale misdaadbestryding-inisiatief wat deur president Cyril Ramaphosa tydens sy 2026 Staatsrede aangekondig is.
Die SAPD en SANDF sê hulle bly daartoe verbind om saam met ander wetstoepassing-agentskappe en die regering te werk om te verseker dat kriminele netwerke ontwrig, oortreders aanspreeklik gehou en gemeenskappe beveilig word.
“Operasie Prosper sal in sy volgende fase voortgaan om druk op misdadigers toe te pas.” – Bron SAPD
Afpersers eis R2000, toe skiet hulle
Koeldrank kos byna man sy lewe
MISDAADTONEEL: Browns Farm, Kaapstad: ‘n Paar koeldranke het amper ‘n afleweringsman sy lewe gekos nadat hy voor ‘n winkel geskiet is, na bewering deur afpersers.
Volgens die mediakantoor van die Wes-Kaapse polisie het die Nyanga-polisie Donderdag 4 Junie 2026 omstreeks 14:55 gereageer op ‘n skietery in Nzinziniba-straat in Browns Farm.
Toe die polisie by die toneel aankom, het hulle die slagoffer voor ‘n winkel gevind met ‘n skietwond aan sy kop. Hy is na ‘n hospitaal geneem vir behandeling.
Volgens berigte was die slagoffer besig om koeldrank by die winkel af te lewer toe twee verdagtes hom nader en R2000 kontant geëis het. Die winkeleienaar het die winkel toegemaak en die slagoffer en sy kollegas alleen buite gelos.
Hulle het probeer vlug, maar die verdagtes het losgebrand en die 44-jarige man gewond. ‘n Saak van poging tot moord word ondersoek en die verdagtes is steeds op vrye voet.
Vermeende afpersers vasgetrek
Polisie slaan in die nag toe
MISDAADTONEEL: Browns Farm, Kaapstad: Die polisie het vandeesweek week twee vermeende afpersers gearresteer en terselfdertyd onwettige vuurwapens gekonfiskeer.
Lede van Operasie Lockdown 3 het Donderdag, 4 Junie 2026, omstreeks 01:00 na ‘n huis in Browns Farm gegaan nadat hulle inligting ontvang het oor ‘n vermeende afperser.
Met hulle aankoms by die huis in Kamela-straat het hulle die verdagte daar gekry. Die polisie het die huis deursoek en op ‘n haelgeweer, toegedraai in plastiek, onder die verdagte se bed afgekom.
Die 41-jarige man is gearresteer vir die besit van ‘n ongelisensieerde vuurwapen en ammunisie.
Marikana informele nedersetting: Die dag tevore, Woensdag 3 Junie 2026, is ‘n 35-jarige man, wat deur misdaad-intelligensie uitgewys is vir beweerde betrokkenheid by afpersing, by sy huis in Marikana gearresteer.
Sy huis is omstreeks 23:00 deursoek en die polisie het ‘n 9 mm-pistool en nege rondtes ammunisie gevind.
Tafelsig: Die openbare orde-eenheid het Woensdag, 3 Junie 2026 ‘n 35-jarige man in Tierkloof-straat, Tafelsig, gearresteer vir die besit van dwelms. Die arrestasie het gekom toe die polisie in die gebied gepatrolleer en ‘n wenk oor dwelms by ‘n huis in die buurt ontvang het. Hulle het die huis deursoek en 20 sakkies kokaïen, sewe plastieksakke en ses rolle dagga gevind.
9 verdagtes in Khayelitsha en Saldanha vas
Polisie red ontvoerde sakeman
MISDAADTONEEL: Summer Greens, Kaapstad: ‘n Polisie soektog wat in Summer Greens naby Milnerton begin het en speurders eers na Khayelitsha gelei het, het Maandagaand 1 Junie 2026 in Saldanha geëindig waar ‘n ontvoerde sakeman gered is.
Volgens ‘n polisie media skakelbeampte, brigadier Novela Potelwa, word beweer dat die 51-jarige sakeman en ander bewoners op 25 Mei 2026 in ‘n huis in Summer Greens beroof is.
Sewe verdagtes het die mense in die huis van selfone en ‘n groot bedrag kontant beroof voordat hulle die sakeman ontvoer en ‘n losprys geëis het, het Potelwa gesê.
“Na die ontvoering het lede van die anti-ontvoeringstaakspan in die Wes-Kaap, intelligensie-operateurs en spesiale taakmaglede Vrydagaand 29 Mei 2026 op verskeie persele in Makhaza, Khayelitsha, toegesak waar hulle vyf verdagtes gearresteer het.
“Verdere inligting het die taakspan na ‘n huis in Basil February-straat in Saldanha gelei waar ‘n persoon gearresteer is. Hulle het later op ‘n ander huis in Noordsestraat, ook in Saldanha, toegeslaan waar die gyselaar gered en drie verdagtes gearresteer is.
“Die gyselaar, wat vasgebind was en beseer voorgekom het, is na ‘n mediese fasiliteit geneem vir behandeling,” het sy gesê.
Die verdagtes, sewe mans en twee vroue tussen die ouderdomme van 20 en 50-jaar, sal na verwagting Woensdag 3 Junie in die Kaapstadse landdroshof verskyn op aanklagte van die besit van gesteelde eiendom, vuurwapens en ammunisie, asook roof, ontvoering en afpersing.
Die Wes-Kaapse SAPD-bestuur het die anti-ontvoeringstaakspan geprys vir die goeie spuerwerk wat gelei het tot die redding van die gyselaar en arrestasies.