Kaapstad misdaad
Man vermoor, twee in aanval gewond
Skietery in Cafda eis een
MISDAADTONEEL: Cafda Village, Kaapstad: ‘n Vrou en twee mans is Dinsdagaand, 10 November 2026, hier geskiet. Een van die mans is op die toneel oorlede.
Volgens ‘n skakelbeampte vir die Wes-Kaapse polisie, sersant Wesley Twigg, ondersoek speurders van Steenberg ‘n saak van moord en twee aanklagte van poging tot moord ná die voorval wat omstreeks 21:15 in Gordon Searle-straat, Cafda, Retreat, plaasgevind het.
“’n 38-jarige man is geskiet en noodlottig gewond, terwyl ‘n ander man en ‘n 44-jarige vrou ook gewond is. Toe polisiebeamptes op die toneel aankom, het hulle die slagoffers met skietwonde aan hul liggame aangetref.
“Volgens berigte het die slagoffers in die pad gestaan toe insittendes van ‘n wit Hyundai Getz op hulle begin skiet het, waarna die aanvallers van die toneel gevlug het,” het Twigg gesê.
Enigeen met inligting oor die voorval kan Crime Stop by 08600 10111 kontak of die MySAPS-toepassing gebruik om inligting anoniem deur te gee.
Slagoffers afgemaai terwyl hulle voor huis sit
Vier in Grassy Park geskiet
MISDAADTONEEL: Grassy Park, Kaapstad: Drie mense is hier doodgeskiet en een gewond in ’n massaskietery Sondagaand, 8 November 2026.
Net ’n entjie verder in Sewende-laan, Lotusrivier, is nog ’n persoon dieselfde aand doodgeskiet.
Speurders van die Anti-Bende-eenheid ondersoek die skietvoorval wat omstreeks 20:15 in Glen-singel, Grassy Park plaasgevind het, sê die bevelvoerder van die Wes-Kaapse polisie se mediasentrum, luitenant-kolonel FC van Wyk.
“Die voorval het die lewens van drie mans tussen die ouderdomme van 22 en 39-jaar gevat en ’n vierdeeen is gewond.
“Volgens inligting het ’n wit Toyota Tazz voor ’n huis in Glen-singel, waar die vier slagoffers gesit het, gestop. Die insittendes van die voertuig het toe op die vier geskioet en van die toneel gevlug,” sê Van Wyk.
Enigiemand met inligting wat die ondersoek kan help, word dringend versoek om Stop Misdaad by 08600 10111 te kontak of die MySAPS-App anoniem te gebruik.
Man (21) sterf, seun (13) gewond in een voorval
Drie in Belhar geskiet
MISDAADTONEEL: Belhar, Kaapstad: ‘n 21-jarige man is doodgeskiet en ‘n 13-jarige seun is gewond tydens ‘n skietvoorval Sondagoggend, 1 November 2026.
‘n Woordvoerder vir die Wes-Kaapse polisie, sersant Wesley Twigg, sê die Belhar-polisie het aanvanklik twee aanklagte van poging tot moord oopgemaak ná die voorval wat omstreeks 08:50 in Buren-straat plaasgevind het.
“Polisielede is na die misdaadtoneel ontbied waar hulle die slagoffers met skietwonde aan hul liggame aangetref het. Albei slagoffers is na ‘n mediese fasiliteit geneem vir behandeling.
“Die 21-jarige man het egter later in die hospitaal aan sy beserings beswyk. Die omstandighede rondom die voorval word ondersoek en niemand is nog gearresteer nie,” het Twigg gesê.
In ‘n ander skietvoorval in Belhar is daar berig dat ‘n man Saterdagaand langs die Engen-vulstasie in Belhar-rylaan gewond is.
Enigiemand met enige inligting oor die voorvalle kan Crime Stop skakel by 08600 10111 of die MySAPS-App anoniem gebruik.
Twee mans voor talle mense in besige straat geskiet
5 vas kort na dubbele-moord
JONGSTE! ‘n Week nadat twee mans koelbloedig in Military-weg, Steenberg doodgeskiet, het speurders van die Anti-Gang-Unit (AGU) ‘n deurbraak gemaak en vyf verdagtes op twee klagte van moord aangekla. Die vyf mans is aanvanklik gearresteer vir die besit van ongelisensieerde vuurwapens ná ‘n hoëspoed-jaagtog, waartydens twee outomatiese gewere en ‘n pistool op Dinsdag, 20 Oktober 2026, in hul besit gevind is.
Volgens die polisie het AGU-speurders dag en nag gewerk en genoegsame bewyse ingesamel wat die verdagtes met die dubbelmoord verbind. Die vyf sal Donderdag, 29 Oktober 2026, in die Wynberg-landdroshof verskyn.
MISDAADTONEEL: Steenberg, Kaapstad: Vyf verdagtes is minute ná ‘n dubbele-moord in Military-weg Dinsdag, 20 Oktober 2026, gearresteer.
Chaos het omstreeks 12:30 Military-weg, wat aan albei kante met winkels, mediese praktyke en informele handelaars bedrwyig is, uitgebreek toe gewapende mans vanuit ‘n motor op mense begin skiet het.
Volgens ‘n mediaskakelbeampte van die Wes-Kaapse polisie, konstabel Ndakhe Gwala, het lede van Operasie Prosper, ondersteun deur die SA Nasionale Weermag, op die skietery reageer, waartydens twee mans van 23 en 37-jaar-oud noodlottig gewond is.
“Hulle is ingelig dat die verdagtes in ‘n rooi VW Polo gevlug het. ‘n Hoëspoed-jaagtog het gevolg, en die verdagtes het hul voertuig sowat twee kilometer verder in Kirstenhof agtergelaat.
“Hulle het daarna ‘n wit Toyota RunX gekaap. Kort daarna is hulle egter vasgetrek, en tydens ‘n deursoeking van die voertuig het die polisie op twee aanvalsgewere beslag gelê. Vyf manlike verdagtes, onderskeidelik 27, 28, 31, 32 en 40 jaar oud, is gearresteer.
“Sodra hulle aangekla is, sal hulle in die Wynberg-landdroshof verskyn,” het Gwala gesê.
Die bestuur van die SAPD in die Wes-Kaap het die vinnige arrestasie van die vyf verdagtes, wat met bendes verbind word, verwelkom.
JP Smith, die Stad Kaapstad se burgemeestesrkomiteelid vir veiligheid en sekuriteit, sê wetstoepassing-personeel van die Stad was ook betrokke by die arrestasie van die vyf mans.
5 sterf, 3 gewond in Lavender Hill bloedbad
Massa moordenaars steeds gesoek
MISDAADTONEEL: Lavender Hill, Kaapstad: Die polisie is steeds op soek na verdagtes in die massamoord-voorval waarin vyf mense dood en drie gewond is Saterdagaand, 24 Oktober 2026.
Die verdagtes het nou ’n prys van R100 000 op hul koppe nadat die polisie die beloning aangekondig het vir enigiemand met inligting wat kan lei tot hul arrestasie en suksesvolle vervolging.
Die voorval het omstreeks 20:00 Saterdagaand plaasgevind toe ongeidentifiseerde mans ’n huis in Blode-straat, Lavender Hill, bestorm en begin losbrand op familie en vriende wat sosiaal verkeer het.
Vier mans en een vrou, tussen die ouderdomme van 21 en 33-jaar, is op die toneel dood. Een man en twee vroue het skietwonde opgedoen en is na ’n hospitaal gehaas vir behandeling.
Luitenant-generaal Sizakhele Dyantyi, die Wes-Kaapse provinsiale polisiekommissaris, en sy bestuur het die misdaadtoneel Sondagoggend, 25 Oktober 2026, besoek.
Dyanti sê “dit kan nie normaal wees dat mense in groot getalle vermoor word in die gemeenskappe waarin ons woon nie”.
Hy het gevra dat mense met enige inligting oor die skietery, of wat met die ondersoek kan help, om Crime Stop by 08600 10111 te kontak of die MySAPS-toepassing anoniem te gebruik.
Dyantyi het ook die skuldiges veroordeel wat polisiebeamtes van Steenberg polisiestasie met klippe bestook het toe by die misdaadtoneel opdaag.
Mark Nicholson, ’n slagoffer se vader en mede-stigter van die Lavender Hill Community Action Network, het die polisie verslae dat die skietery bende-verwant was, sterk betwis.
Nicholson het gesê die mense wat by die huis byeengekom het, was gewone jeugdiges en familielede, and dat die tragedie verwoestend is aangesien hy reeds sewe van sy nefies in die voortslepende plaaslike geweld verloor het.
Lees ook: Twee sterf in Lavender Hill skietery – Crime Scene Report; 5 vas kort na dubbele-moord – Crime Scene Report
Verdagtes op vlug in VW Polo
Man in kar afgemaai
MISDAADTONEEL: Die polisie is op soek na ten minste twee verdagtes nadat ’n 30-jarige man in sy motor doodgeskiet is.
Die voorval het vroeg Vrydagaand, 23 Oktober 2026, plaasgevind.
Konstabel Ndakhe Gwala, ’n skakelbeampte vir die Wes-Kaapse polisie, sê die Grassy Park-polisie het ’n saak van moord geopen ná die skietery omstreeks 18:15.
“Volgens berigte het die oorledene in sy kar gesit toe hy deur twee verdagtes genader is. Albei het hom in die kop geskiet en in ’n wit VW Polo van die toneel gevlug. Die 30-jarige man is deur mediese personeel op die toneel dood verklaar.
“Die aanval is bende-verwant en niemand is tot dusver gearresteer nie,” het Gwala gesê.
Skieter gee kopskoot terwyl 16-jarige op grond lê
Tiener koelbloedig vermoor
MISDAADTONEEL: Belhar, Kaapstad: ’n Tiener se lewe is brutaal kortgeknip toe hy voor ’n huiswinkel doodgeskiet is.
Volgens ’n skakelbeampte vir die Wes-Kaapse polisie, konstabel Ndakhe Gwala, het die skietery Vrydag, 23 Oktober 2026, omstreeks 07:50 voor in Adam Tas-laan, Belhar, plaasgevind.
Gwala sê die 16-jarige slagoffer is volgens berigte deur drie onbekende mans genader.
“Een van die verdagtes het die oorledene in die been geskiet, waarna hy geval het. Die verdagte het hom toe in die kop geskiet. Hy is op die toneel deur mediese personeel dood verklaar.
“Daar word vermoed dat die motief vir die aanval bende-verwant is, en geen arrestasies is tot dusver gemaak nie. Die Belhar-polisie het ’n saak van moord geopen,” het Gwala gesê.
Lyk van onbekende man vol skietwonde gevind
Derde skietvoorval in Strandfontein
MISDAADTONEEL: Strandfontein, Kaapstad: Nog ‘n persoon is in Strandfontein doodgeskiet – die derde noodlottige skietvoorval in gebied in minder as ‘n week.
Die bevelvoerder van die Wes-Kaapse provinsiale mediasentrum, luitenant-kolonel FC van Wyk, sê polisiebeamptes het Donderdag 22 Oktober 2026 omstreeks 23:00 op ‘n skietvoorval in Garden Lane, Strandfontein, reageer.
“Hulle het die liggaam van ‘n onbekende man op ‘n oop veld in die straat gevind; sy liggaam was vol skietwonde.
“Die omstandighede rondom hierdie voorval word ondersoek. Daar word vermoed dat die motief bendeverwant is. Niemand is op hierdie stadium gearresteer nie,” het Van Wyk gesê.
Die voorval het slegs ‘n paar dae ná nog ‘n skietery, Maandagaand, 19 Oktober 2026 omstreeks 20:45 in Korvettestraat, Strandfontein, waar ‘n 26-jarige man doodgeskiet is, plaasgevind.
En verlede Saterdag, 17 Oktober 2026, is twee mans, onderskeidelik 33 en 44-jaar-oud, in Dinghie-sirkel, Strandfontein, doodgeskiet, terwyl twee ander in dieselfde voorval gewond is.
Lees ook: Skietery ruk Strandfontein – Crime Scene Report; Nog ‘n man in Strandfontein geskiet – Crime Scene Report
Verdagtes in BMW teiken jongmense voor winkel
Kinders gewond in skietery
MISDAADTONEEL: Heideveld, Kaapstad: Drie jongmense is gewond tydens ‘n skietery vanuit ‘n voertuig buite ‘n winkel.
Volgens ‘n skakelbeampte vir die Wes-Kaapse polisie, konstabel Ndakhe Gwala, is die slagoffers – ‘n 10-jarige seun, ‘n 12-jarige meisie en ‘n 19-jarige tienerseun – Woensdag 21 Oktober 2026 omstreeks 16:00 buite ‘n winkel op die hoek van Jonkershoek- en Bloukransweg in Heideveld geskiet.
“Die Manenberg-polisie het drie aanklagte van poging tot moord geregistreer na aanleiding van die skietvoorval. Volgens berigte het ‘n grys BMW in die straat gery, waarna twee mans op die slagoffers begin skiet het.
“Die motief vir die skietery moet nog vasgestel word en niemand is tot dusver gearresteer nie,” het Gwala gesê.
Drie verdagtes skiet vriende in Lentegeur pad
Man doodgeskiet, vriend gewond
MISDAADTONEEL: Mitchells Plain, Kaapstad: ‘n Man is doodgeskiet en sy vriend gewond tydens ‘n skietery in Lentegeur.
‘n Wes-Kaapse polisiewoordvoerder, konstabel Ndakhe Gwala, sê die voorval het Maandagaand, 19 Oktober 2026 omstreeks 22:10 in Kreupelhout-straat plaasgevind.
“Volgens verslae is die oorledene en sy vriend genader deur drie gewapende verdagtes wat op hulle losgebrand het. Een man is dood op die toneel en die tweede slagoffer het skietwonde aan sy regterbeen opgedoen.
“Die motief vir die aanval is die onderwerp van ‘n polisie-ondersoek en geen arrestasies is op hierdie stadium gemaak nie,” het Gwala gesê.
Die Lentegeur-polisie ondersoek ‘n saak van moord en poging tot moord.