Kaapstad misdaad
Polisie kry dwelms, selfone en kondome in kar
Bewaarder by tronk gearresteer
MISDAADTONEEL: Goodwood, Kaapstad: ‘n 47-jarige bewaarder is gearresteer nadat hy na bewering in besit van dwelms en ander goedere gevind is.
Volgens die Suid-Afrikaanse Polisiediens (SAPD) het die Anti-Bende-Eenheid en Korrektiewe Dienste se noodondersteuning-span Woensdag 12 Augustus 2026 omstreeks 6:40 ‘n padblokkade by die Goodwood-gevangenis gehou.
“’n Voertuig wat deur ‘n bewaarder bestuur is, is voorgekeer en deursoek. Die lede het 600 Mandrax-tablette, 100 gram Tik, 300 gram dagga, 23 selfone, drie pare oorfone, vyf USB-sticks, 10 kondome en 60 libido-tablette in die bewaarder se voertuig gevind.
“Die geraamde waarde van die dwelms is ongeveer R65 000. Die bewaarder is gearresteer en sal in die Goodwood-landdroshof verskyn sodra hy aangekla is,” het die SAPD gesê.
Polisie vang ook man met dwelms in Observatory
Tiener vas vir vuurwapen
MISDAADTONEEL: Atlantis, Kaapstad: Die Suid-Afrikaanse Polisiediens (SAPD) se Anti-Bende-Eenheid het ‘n tienerseun gearresteer vir die besit van ‘n ongelisensieerde vuurwapen.
Die polisie het die 19-jarige saam met ‘n 36-jarige man omstreeks 22:50 op Sondag, 9 Augustus 2026 in Zeelandstraat, Atlantis, gearresteer..
Die tienerverdagte is gevang vir die besit van ‘n ongelisensieerde vuurwapen nadat die lede sy woning deursoek het, en die ouer man vir die besit van ammunisie na die ontdekking van 15 rondtes ammunisie in sy huis.
Observatory: Operasie Shanela-lede het inligting opgevolg wat hulle Maandag 10 Augustus 2026 ontvang het oor ‘n man wat in Wrensch-straat, bly en vermoedelik by bende-verwante aktiwiteite betrokke is.
Volgens die SAPD het Shanela-lede omstreeks 13:30 op die woning toegeslaan. Hulle het die perseel deursoek en een sakkie Tik wat 830,41 gram geweeg het, gevind.
‘n 54-jarige man is gearresteer vir die besit van dwelms.
Verdagte probeer wegkom, maar gou gestuit
3 vermeende afpersers gevang
MISDAADTONEEL: Strand, Helderberg: Drie vermeende gewapende afpersers is in die Strand gearresteer.
Lede van die Suid-Afrikaanse Polisiediens (SAPD) se Operasie Lockdown 3 span Vrydag 7 Augustus 2026 het die verdagtes, tussen die ouderdomme van 22 en 24-jaar, gearresteer vir die besit van ‘n ongelisensieërde vuurwapen, besit van ‘n verbode vuurwapen en ammunisie .
Volgens die SAPD het die span inligting ontvang oor die mans wat in ‘n silwer Ford Focus ron ry en na bewering besighede in die Strand-gebied afpers.
“Hulle het die voertuig omstreeks 21:30 in Xaki-straat, Strand, opgemerk. Een van die verdagtes het probeer om met ‘n plastieksak te vlug, maar hy is gevang met twee vuurwapens en 15 rondtes ammunisie.
“Die drie sal Dinsdag 11 Augustus 2026 in die Strand-landdroshof verskyn,” het die SAPD gesê.
Polisie soek verdagtes ná Soutrivier skietery
Man doodgeskiet, suster beseer
MISDAADTONEEL: Soutrivier, Kaapstad: Die Suid-Afrikaanse Polisiediens (SAPD) soek na verdagtes wat verantwoordelik is vir die moord op ‘n man en poging tot moord op sy suster Maandagaand, 3 Julie 2026.
Die SAPD het bevestig dat ‘n saak van moord en poging tot moord by die Woodstock-polisiestasie aanhangig gemaak is ná die voorval.
Thembakazi Mpendukana, ‘n skakelbeampte vir die Wes-Kaapse polisie, het gesê die skietery het omstreeks 21:05 in Burns-weg, Soutrivier, plaasgevind.
“’n 46-jarige man is geskiet en is met sy aankoms by die hospitaal dood verklaar. Sy suster het geringe beserings opgedoen en ontvang mediese sorg. Geen arrestasie is nog gemaak nie,” het Mpendukana gesê.
Twee mans ook gewond toe verdagtes losbrand
Tiener sterf in Atlantis-skietery
MISDAADTONEEL: Atlantis, Kaapstad: Drie mense geskiet, waarvan een noodlottig, toe gewapende verdagtes Woensdagaand, 29 Julie 2026, in Witsand op hulle losgebrand het.
Volgens ‘n woordvoerder vir die Wes-Kaapse polisie, sersant Wesley Twigg, het die polisie omstreeks 19:55 op ‘n skietvoorval in Thambo-straat, Witsand, Atlantis, gereageer.
“Toe die lede op die toneel aankom, het hulle die slagoffers met skietwonde aan hul liggame aangetref. ‘n 19-jarige man is deur mediese personeel op die toneel dood verklaar, terwyl die ander slagoffers, 21 en 27-jaar-oud, na ‘n mediese fasiliteit vervoer is vir behandeling.
“Die verdagtes het van die toneel gevlug en die motief vir die aanval moet nog bepaal word. Speurders van Atlantis ondersoek moord- en poging tot moordsake,” het Twigg gesê.
Enigiemand met enige inligting oor die voorval kan Misdaad kontak by 08600 10111 of die MySAPS-App anoniem gebruik.
Polisie vang ook afpersers in ander geval
Roof verdagte gou gevang
MISDAADTONEEL: Heathfield, Kaapstad: Privaat sekuriteitswagte en die Suid-Afrikaanse Polisiediens (SAPD) het vinnig reageer en ‘n verdagte gearresteer minute nadat ‘n supermark Woensdagmiddag, 29 Julie 2026 beroof is.
Sersant Wesley Twigg, ‘n skakelbeampte vir die Wes-Kaapse polisie, sê die Kirstenhof-polisie het ‘n saak van sakeroof oopgemaak ná ‘n rooftog by ‘n supermark in Hoofweg, Heathfield, omstreeks 12:30.
“Onbekende verdagtes het die winkel binnegegaan en een van die klante van haar selfoon beroof. Die verdagtes het van die toneel gevlug toe sekuriteitswagte opdaag.
“Ons kan bevestig dat een volwasse man gearresteer is toe hy in besit van die selfoon wat aan die klant behoort gevind is,” het Twigg gesê.
Toe Crime Scene Report se verslaggewer by die toneel aankom, was die verdagte agter in ‘n polisievangwa toegesluit en die toneel afgesper, terwyl die polisie dit vir moontlike leidrade gefynkam het.
Geen beserings is op die toneel aangemeld nie.
Nyanga: Pogings om afpersing in die Nyanga-gebied te bekamp, het sukses opgelewer toe polisielede twee verdagtes gearresteer het.
Lede van die Nyanga-polisie het patrollies in Mfenyane-weg uitgevoer toe hulle inligting ontvang het oor twee skobbejakke wat besig was om winkeleienaars af te pers.
Die SAPD sê hulle het die inligting opgevolg en mans wat by die beskrywing pas gesien. Toe die verdagtes die polisie gewaar, het hulle gevlug, maar is met behulp van die gemeenskap aangekeer. ‘n 9 mm-pistool met ammunisie en ‘n nagemaakte vuurwapen is gekonfiskeer.
Die verdagtes, onderskeidelik 21 en 24-jaar-oud, staar aanklagte van die onwettige besit van ‘n vuurwapen en ammunisie, asook die besit van ‘n nagemaakte vuurwapen in die gesig.
Hanover Park: In ‘n onverwante saak het lede van die Anti-Bende-Eenheid voetpatrollies in Petunia-straat, Hanover Park, gedoen toe hulle opmerk hoe ‘n verdagte begin hardloop toe hy hulle sien.
“Die polisie lede het die verdagte agternagesit en hy iets laat val terwyl hy hardloop. By verdere ondersoek het hulle ‘n 9 mm-pistool met ammunisie in ‘n erf gevind. ‘n Ondersoek na die oorsprong van die vuurwapen is geopen,” het die SAPD gesê.
Polisie slaan toe by twee huise
3 vas oor onwettige wapens
MISDAADTONEEL: Macassar, Kaapstad: Die Suid-Afrikaanse Polisiediens (SAPD) het vier onwettige vuurwapens uit die gemeenskap verwyder en drie verdagtes gearresteer.
Die SAPD het gesê ‘n intelligensie-gedrewe operasie deur die Khayelitsha- en Macassar-polisie het gelei tot die arrestasie van twee verdagtes en ontdekking van drie vuurwapens Sondag, 26 Julie 2026.
Die polisie sê hulle het inligting ontvang oor vuurwapens by ‘n huis in Ring-laan, Macassar, en die perseel deursoek. Hier het hulle ‘n 9 mm-pistool met vyf rondtes ammunisie in ‘n motor gevind.
“Verdere ondersoek het die lede na die agterkant van die huis geeem waar hulle ‘n .38 Special-rewolwer met 48 rondtes ammunisie en ‘n 9 mm-pistool gevind het. Twee mans is gearresteer vir die besit van ongelisensieerde vuurwapens en ammunisie,” het die SAPD gesê.
Maandagaand, 27 Julie 2026 was lede van Macassar-polisie besig met patrollies toe hulle inligting ontvang het oor ‘n vuurwapen by ‘n perseel in Ray-straat.
“Die lede het die huis deursoek en ‘n 9 mm-pistool met agt rondtes ammunisie onder die bad gevind het. ‘n Volwasse man is gearresteer vir die besit van ‘n ongelisensieerde vuurwapen en ammunisie,” het die SAPD gesê.
Meer as 500 mense agter tralies in 'n week
Stad se polisie ewenaar rekord
KAAPSTAD: Wetstoepassers van die Stad Kaapstad het die afgelope week tot Sondag 26 Julie 2026 ‘n rekord 527 arrestasies gemaak.
Die aantal arrestasies ewenaar die rekord wat vroeër vanjaar behaal is.
“Die druk op ons personeel is groot, maar hulle lewer steeds resultate. Elke arrestasie is egter nog ‘n herinnering aan hoe swak mense se gedrag is,” het die Stad se burgemeesterskomiteelid vir Veiligheid en Sekuriteit, JP Smith, gesê.
Wetstoepassingsbeamptes het 334 arrestasies gemaak en 14 372 boetes uitgereik terwyl die Metropolisie 126 verdagtes gearresteer het.
Beamptes het ook drie onwettige vuurwapens, ‘n nagemaakte vuurwapen, nege rondtes ammunisie, verskillende dwelms en ses gesteelde en/of gekaapte voertuie teruggevind.
Verkeersbeamptes het 67 verdagtes gearresteer – 53 vir dronkbestuur, vier vir roekelose en nalatige bestuur en 10 op ander aanklagte. Hulle het 1 722 lasbriewe uitgevoer, 168 openbare Vervoer voertuie gekonfiskeer en 53 012 boetes uitgereik.
Slagoffer een keer in die kop geskiet
Lyk op veld gevind
MISDAADTONEEL: Mitchells Plain, Kaapstad: Die Suid-Afrikaanse Polisiediens (SAPD) ondersoek ‘n moordsaak na die ontdekking van ‘n liggaam in Lentegeur.
Kaptein FC Van Wyk, ‘n mediaskakelbeampte vir die Wes-Kaapse polisie, het gesê die Lentegeur-polisie het Dinsdag, 21 Julie 2026 reageer op ‘n klagte oor ‘n skietery by ‘n veld in Lobelia-straat.
“Toe die lede omstreeks 15:30 by die toneel aankom, het hulle ‘n man in sy 20s met ‘n skietwond aan die kop op die veld gevind. Die omstandighede rondom hierdie voorval word ondersoek. Die motief en verdagte is onbekend,” het Van Wyk gesê.
Wetstoepassers raak toe baba oppassers
Goedheid seëvier in Delft
WETSTOEPASSERS van die Stad Kaapstad het weereens gewys daar is nog goed in die wêreld ten spyte van al die onsmaaklikhede – messtekery, vuurwapen skote en oorloë – wat ons daagliks in die gesig staar.
Net vroeër vandag het Crime Scene Report ‘n storie gepubliseer oor ‘n pasgebore baba se liggaam wat in ‘n vlak graf in Hanover Park gevind is. Twee mense is reeds gearresteer geneem vir hierdie afskuwelikste van misdade.
Maar tog moet ons nie ons oë en ore toemaak vir die goeie goed wat daagliks reg voor ons gebeur nie. Ja, daar is steeds goeie mense. VANDAG SE HELDE!
Neem die geval van boegenoemde wetstoepassingsbeamptes wat sowat 23:00 op Sondagaand, 19 Julie 2026 besig was om voertuie in Delft afgetrek het.
Terwyl die beamptes ‘n verkeersboete uitgereik het, het hulle ‘n man sien verbyloop met ‘n huilende baba.
By nadere ondersoek, sê die beamptes, het hulle opgemerk dat die kind nie warm genoeg aangetrek was vir die toestande nie, en ook nie met ‘n kombers toegemaak was nie. Daarbenewens het hulle ook gesien die man, wat homself as die baba se pa geïdentifiseer het, smoordronk was.
Die beamptes het onmiddellik opgetree en die baba, saam met die pa, na die Delft-polisiestasie geneem waar hulle maatskaplike werkers in die hande gekry het om die saak te ondersoek en die kind na ‘n plek van veiligheid te ne neem.
“’n Mens kan net wonder wat sou gebeur het as ons beamptes nie ingegryp het nie. Slegs die afgelope week het wetstoepassers 93 motoriste vir dronkbestuur gearresteer.
“Hierdie voorvalle is ‘n bewys daarvan hoe ons alkoholmisbruik genormaliseer het, terwyl dit in werklikheid een van die mees verwoestende uitdagings vir ons sosiale struktuur bly,” het die Stad se Burgemeesterskomiteelid vir Veiligheid en Sekuriteit, Raadslid JP Smith, gesê.